لو بتحب بلدنا بجد ..مد إيديك وأنا بردو همد
لو بتحب هواها .. وليلها .. ودفى شوارعها
ألضم إسمك بحروف إسمي
ونحمي حدودها بأعظم سد
لو بتحب ترابها بجد؟
علّي معايا وأبني معايا
نزيد في بناها ..بحصن وقلعة
ومانسمحشي لحد يهد
لو بتحب بحورها ونيلها..ووادي نخيلها
وشجر التوت اللي ف بساتينها
قرب ليا واسمع مني
وإعرف ليه مش طايق حد؟
لو بتحب عصيرها وناسها .
. وقصب السكر ويّا شعيرها
وعيون اطفالها وبناتها..
ودعوة أم ساجده في ليلها
لو بتحب برج حمامها وتكعيبة حلوة بفضلة خيرها
او حتى كراكيب مناويرها؟
لو بتحب الورد البلدي
الأحمر فوق عناقيد مشاتيلها
لو بتحب سماها الصافيه
وطيبة ناسها
وأسفلت... ورصيف شوارعها؟
أيدي ف إيدك .. تبت .. ثبت .. شبك ايدك
فيدني ..أفيدك ... إحمي ابني وبنتي
وعرضي
نفسي أحس بضمة أيدك
لو بتحبها ؟؟ يبقى بجد
.. خليك دايما جزر ومد
خليك سيف مسلول الحد
خليك فارس.. خليك حارس
خليك حاسس
باللي تاعبني مرة بجد !!!!ا
شعر سحر علي ((حكاية حووور)ا
تنبيه : لو عجبك أى موضوع ولقيت إنه مفيد لأصحابك اعمل شير على الفيس بوك أو تويتر واعلم بأن كاتم العلم يلعنه الله ويلعنه اللاعنون
